٢٠٠٨-٠٨-٢٦

أول تاج - هديه من ريم


أحيانا بيكون التاج دمه خفيف وبس واحيان بيقول اسئله تبين حقيقة الشخصيات بجد وأحيانا بيكون طلاسم .. التاج ده بسيط وخفيف زي ريم اللي بعتتهولي
وإللي بأسميها طفله التدوين لبساطة اسلوبها .. وشغفها بالموضوع
ولأنها أول مره تطلب مني حاجه وأول مره تهدي لي هديه .. فلها الإجابات

بدات التدوين من امتى ودخلت العالم ده ازاى؟
اتعرفت على التدوين من خلال النت بالصدفة من حوار مع أحد الأصدقاء المدونين المخضرمين ..وقلت ألعب وأجرب أعمل مدونة
وفي الحقيقة طلع عالم أكبر مما توقعت بكتير
أما التدوين بمعناه الحقيقي ككتابة فمن زمن .. في أغلفة الكتب .. ثم أجندة خاصة أيام الجامعة ودي رميتها بعد كده .. ثم أجنده خاصه بعد التخرج مازلت احتفظ بيها لأنها بها تعليقات غاية في البراءة والسذاجة علي موضوعات قوية... كذلك علي قصاصات ورق مقطوعة من أي حاجه.. وتعليقات في اجندات الشغل .. لكنه ككتابه لم يتخطي أبدا بضع سطور ساعات باقراها بالصدفه وابتسم.
ايه كان انطباعك فى البداية؟
أنطباعي كان أن التدوين هو باب للتسلية .. وماكنتش متخيلة لفكرة أن حد يسمعني بأكلم نفسي
لكن مع الوقت أنطباعي أتغير أتعلمت حاجات كتير – موضوعات في السياسة والأدب والتاريخ والدين _ لأن أي بوست حتي لو كان صغير طالما أعجبتني الصياغة بيخليني أفكر في الموضوع وأبحث وحدي فيه
مين اكتر واحد بتعتز بتعليقه على بوستك الجديد ؟
كل مره بألاقي تعليق بأكون سعيده لأن شخص أهتم بكلام كتبته حتي لو كان الكلام بسيط أو ساذج
لكن فعلا بأعتز برأي 2من الأصدقاء المقربين جدا بيكلموني شخصيا يعلقوا علي البوست أو المدونة عموما وبأنتظر أرائهم كأني في الامتحان.. بأحس أنهم فعلا بيعلقوا بصدق مش مجرد تفاخر بالمعلومات
ايه اكتر حاجة اتعلمتها من التدوين؟
أتعلمت أن المجتمع أكبر بكتير من ال100 أو 200 شخص اللي الواحد بيتعامل معاهم .. وأن قضايا المجتمع أكثر من الجورنال والتليفزيون وأن فيه مشاكل كتير الناس بتتكلم فيها ببساطه وبصراحة من خلال التدوين
ايه اكتر حاجة كرهتها ؟
أن بعض المدونين ينشر رأيه ويرفض تماما الرأي الأخر .. وممكن يسب ويلعن في صاحب الرأي الأخر .. أحيان بأفكر أني لما بأدخل مدونة حد كأني بأزوره في بيته .. هل يصح أزور حد ويشتمني أو يطردني ؟
معظم المدونين اشخاص مستقبلين للثقافة -حتي الفلاسفه العظام قديما كانوا يستكثرون على أنفسهم إدعاء الحكمة- بالتالي الموضوع أبسط من الجدل اللي البعض بيثيره علي موضوعات أقل بكتير من اللي محتاجين نركز فيه علشان البلد دي تتغير
حاسس ان التدوين له تاثير؟
طبعا .. بيسمح للناس بالنقاش مع عقليات مختلفة ومن بيئات مختلفة وبالتالي ده بيكٌون ثراء فكري
تهدى التاج لمين ؟
بأهدية لنفسي علي أعتبار أني لسه جديده وده أول تاج .. وأتمني أهديه لكل اللي يقراه لكن مش عاوزه أعطل حد

..

هناك ٦ تعليقات:

الريم يقول...

صديقتى الجميلة اجاباتك حلوة اوى وعميقة اد ايه انتى مثقفة وفاهمة وميرسيه ليكى انك اوى انك حلتى التاج وعلى فكرة عجبتنى حكاية طفلة ديه كل اللى بيتعامل معايا بيقولى مش ناوية تكبرى با يمكن انا بحب نفسى كده ومش عايزة اكبر ولا حاجة

speaking يقول...

ريم

أي خدمه (:

أوعي تكبري في قلبك.. لكن أكبري قدام الناس ..أفرحي لما يعاملوكي علي أنك كبيره .. وخليكي عارفه أن مش كل الناس بتعرف تفهم البراءة.. ولما تقعدي مع نفسك افتخري أن قلبك عصفور صغير جميل

قطرات من شواطئ الحياة يقول...

في الأول أحب أقولك مبروك على مدونتك الجميلة أوي دي اللي بجد استمتعت بالمرور بيها
ثانيا إجاباتك جميلة جدا و بسيطة
و على فكرة أنا اللي وصلت التاج ده لريم و بشكرك انت و ريم على حله
و كل سنة و انت طيبة !

هانى زينهم يقول...

على فكرة الاسئلة والاجوبة بجد يدلوا على شخصيات متفهمة ومثقفة.
بس متهيالى لو الواحد بيتعامل مع 200 واحد كان اتجنن!!.وخصوصا فى الايام دى
عموما تحياتى

speaking يقول...

قطرات من شواطئ الحياة
كبير أوي الاسم يا كوكي
شكرا ياجميله

أنا زيك مش بأحب اللي بيلعب علي الدين .. لأننا أصغر من أننا نقييم دين شخص أو أخلاقه بصفه عامه.. كل واحد يراجع نفسه الأول ويعرف طريقه صح وبعدين يقوم يحاكم الناس لو كان عنده وقت

سلام

speaking يقول...

أ/ هاني
لو علي المشاكل ممكن الموضوع يعدي 200 علي فكره
لو حسبت عائلتك والجيران والقرايب القريبين والكام زميل في الشغل هيطلعوا ال100 الأولانيه
وحط معارفهم وحواديتهم هيطلعوا كمان ال100 التانيه
وبالمره سواق التاكسي القرفان من الدنيا وعاوز يفضفض .. والحلاق اللي بيسلي القاعده ... والبواب اللي بيحب يعمل ذكي وفهيم هتلاقي كمان 50 من عندي

سلام